兵工廠發“茅”

    阿仙奴在近三個月真係唔知個“輸”字點寫，各項賽事連續十八場不敗。可惜近兩場英超連失四分，聯賽榜又跌回第四位置。要繼續保持爭標機會，今晚主場迎戰般尼茅夫，兵工廠三分非取不可。

    般尼茅夫上仗一球險勝史篤城，不但跳升至第十位，更在今季聯賽作客開齋贏波，無疑對士氣有所提升。不過，般尼茅夫一向對住強隊例必腳軟，證明球隊以目前人腳，根本難以向列強挑戰，何況作客酋長球場，今戰實在難以發圍。初盤阿仙奴讓一球／球半，上季與般尼茅夫兩度交鋒，兵工廠均以兩球輕取對手，今仗要贏波贏盤，阿仙奴匹“夫”有責。

    阿仙奴雖剛踢完歐冠盃，但今仗又在自己地頭出戰，無需舟車勞頓，相信對球員體能冇太大影響。且球員平均質素與技術，明顯在般尼茅夫之上，只要有正常發揮，應該勝算在握。

    般尼茅夫聯賽六場作客只得一勝二和三負，得四球失十球，既冇殺傷力兼防守不足，大敗在所難免。

    推介：阿仙奴三比〇