墨西哥冇“牙”力贏波

美洲金盃賽由分組賽開始，一路爆，一路爆！連今屆東道主之一嘅奪標頂頭大熱美國，都喺四強被爆出局。做低美國嘅“兇手”牙買加即時“升呢”，明早決戰墨西哥，相信會受到唔少球迷熱捧。何況初盤開出受讓半球，隨時可撼低呢支中北美洲大“哥”。

墨西哥首戰就大勝古巴六球，以為超強勢開“吉”，點知打落四場比賽都係以“和”為貴，四強戰在加時擊敗巴拿馬更加勝之不武，相對於牙買加五戰四勝一和佳績，墨西哥實在不宜過份追捧。牙買加能夠淘汰美國並非僥倖，首先戰術運用相當成功，穩守反擊非常湊效，加上球員之間上下一心，互補不足，打敗美國應該係技術性擊倒。球隊目前士氣“爆錶”兼雄心壯志，要殺敗墨西哥捧盃亦不足為奇。

墨西哥能夠反勝巴拿馬，真係要食“驚風散”，大半場打多一人仲要落後不特止，仲要靠完場前一個問題十二碼追和，加時又係一個“安哥”十二碼才可以解決對手，認真“一額汗”。今日呢場“呃”返嚟嘅決賽，對住牙買加仲有冇咁好彩？就要睇個天“有冇眼”。

推介：牙買加1:1