美國大“聖”格

    明晨有世界盃中北美洲區外圍賽上演，其中C組美國作客聖文森，可以話中北美洲區最強對最弱。

    聖文森目前排名一百四十一位，可想而知足球水平高極有限，四場分組賽不祇全敗，祇攻入三球失十九球，簡直係陪太子讀書。不過，能踢到入分組賽，已算係叻到不得了。聖文森陣中祇有一人稍有名氣在美職聯搵食、效力西雅圖海灣者的安達臣，其他真係唔知叫乜水。首循環作客美國輸一比六算有交代，希望今仗主場可將失球數字減到最低。

    美國在美洲盃祇得殿軍，始終比南美球隊仍技遜一籌，且陣中老兵實在太多，丹普西、碧卡文、雲度路斯基、鍾斯及門將侯活等已到退役年齡，有青黃不接感覺，活特、薩迪斯、普列斯及耶迪連等多名九○後係時候上位。

    美國目前排C組第二位，少榜首特立尼達和多巴哥三分，仍未穩奪出線，今仗定必要全取三分。輸，應該係冇可能，贏得少都唔鍾意。初盤美國讓三球／三球半，實在唔過份，最少四球先收貨。推介：美國5：0