紅軍唔怕“熱”

    英超進入第三輪，頭兩輪保持不敗嘅熱刺今晚遇上剋星利物浦，因近七次對賽未贏過一場兼有五場敗仗，心理上較為輸蝕，亦可能踢法上格食格，今仗要攞足三分並非容易。

    紅軍再度發揮出“海鮮波”本色，開鑼戰反勝阿仙奴贏得精彩，整體踢出極高水準。惜上輪又踢到不知所謂，竟然惨吞升班球隊般尼两蛋，球員遇強越強，遇弱輕敵心態確要檢討。經過上場對般尼教訓，相信克帥已提醒手下戰將，今戰必要踢出爭勝鬥心。

    初盤熱刺讓平手／半球，以雙方人腳比較，屬於半斤八両勢均力敵，熱刺未必讓得起，捧利物浦至少可站於不敗。

    熱刺開季狀態其實唔算處於當“弗”，首戰逼和愛華頓優勢唔多，上場險勝水晶宮都較為艱苦，新加盟攻擊手贊臣仍未適應英超進攻模式，卡尼仔表現又有所回落，導致球隊目前欠缺贏波本錢。

    紅軍除作戰心態需要改善外，防線亦係最大問題，两場聯賽失五球，過於着重進攻的克帥似乎在防守方面必須加強。以前線人員計火力應比熱刺更強，只要做好防守，紅軍坐和望贏。

    推介：利物浦1:0