拜仁炒“梅”菜

    德甲明晨正式開鑼，班霸拜仁慕尼黑打頭陣，主場迎戰雲達不萊梅，如無意外三分應手到拿來，問題係贏多贏少。

    雲達不萊梅上季長期在護級邊緣掙扎，實力根本難與拜仁抗衡，近四季聯賽作客拜仁，最少輸三球，揭幕戰要對住頂班嘅拜仁整定冇運行，極可能再次大敗收場。初盤拜仁慕尼黑讓兩球／兩球半，慕尼黑料將“仁”者無敵。

    拜仁開季先捧德國超級盃，跟住德國盃又大炒對手五蛋，首席射手利雲度斯基連中三元，維達爾兩場都有“士哥”。雖然新加盟的辛捷士及洛賓因傷休戰，但新帥“肥安”手上仍猛將眾多，梅拿、列比利、阿朗素、曉姆斯及剛當選德國足球先生的保定，人強馬壯，絕對高今場對手一班，呢粒“梅”食硬。

    不萊梅屬有前冇後、打死罷就型的球隊，攻力還可以，惜今季二號射手烏查離隊轉戰中超，簽入古斯代替，效果如何要睇過先知。至於防守就不敢恭維，上季共失六十五球係德甲第二多，對住拜仁真係冇眼睇。

    推介：拜仁慕尼黑5:0