巴西生死一戰

    寄予厚望的巴西男足在奧運分組賽面臨出局危機，明早血戰丹麥必要非勝不可，和波的話，就要睇隔籬場戰果，伊拉克對南非只要分出勝負，巴西奧足就可以解散。

    手執四分的丹麥睬你都傻，只需一分即可殺入八強，今戰必會加強防守力度，踢穩守突擊戰術，急於求勝的巴西更加危機四伏。初盤巴西硬讓球半，前兩場零入球，攻擊力名過於實，“森巴兵”根本讓唔起對手，仲要贏兩球先有着數，當然捧丹麥東成“西”就。

    巴西在第二場對伊拉克同對南非一戰一模一樣，贏勢唔贏波，全場超過二十次攻門，可惜真正威脅唔多，埋門一腳始終欠缺把握力，對住以守為主的伊拉克，根本無計可施，今場對住防守力更強的丹麥，巴西好大可能三場比賽成為三“零”部隊。

    丹麥奧足陣中有唔少外流球員，包括在英冠揾食的拉斯維比與麥達臣，效力德甲勁旅多蒙特的J拿臣、萊比錫前鋒保爾臣、荷甲高寧根的卡斯帕拿臣，仲有踢中超河南建業的高美斯，踢得咁高水平的聯賽，丹麥奧足整體實力實在不容忽視。“森巴兵”祝你好運！

    推介：和波 0:0