巴塞無往不“利”

    國際冠軍盃明晨去到英國站，有地頭之利嘅利物浦在溫布萊球場迎戰巴塞羅那。

    利物浦在美洲之旅踢過三場比賽，國際冠軍盃係一勝一負，最後一場與羅馬拍跳輸一比二，勝負當然無關重要，最重要係操起球員狀態。總括嚟講球隊表現不過不失，陣中多名主力都能踢出應有水準，費明奴、拉蘭拿、古天奴、亨達臣及占士米拿等都有不俗發揮。至於新援韋拿度姆、文尼及卡拉雲都算交足功課。由於英超在月中開鑼，首戰就要火併阿仙奴，相信“克帥”今仗會將個陣容執得比較完整，一試最強陣式。

    巴塞先後擊敗些路迪與李斯特城，兩場波攻入七球，雖然三叉戟少咗尼馬，但美斯與蘇亞雷斯一樣夠殺，加上新星艾夏達迪，巴塞依然火力強勁。不過防線共失三球，主帥安歷基都要檢討。隨着布斯基斯與馬斯卓蘭奴兩大防中回歸，防守會有改善。

    兩隊都剛由美國飛抵英格蘭，巴塞更加踢完場對李斯特城就飛往倫敦，休息時間比較短，相信唔會過於拼搏，但以個人技術質素，巴塞勝算應較高。

    推介：巴塞羅那1:0