羅馬抗“紅”

    利物浦踢完兩場國際冠軍盃後，明早又再加操一場友誼賽，與意甲“三哥”羅馬拍跳，跟住三日後再戰國際冠軍盃與巴塞羅那交手。

    踢得咁頻密，相信克帥會大量輪換球員上陣，或會盡量將主力留力對巴塞，免得大敗出醜就無謂。就算強陣硬拼羅馬，亦未必能夠得到甜頭，始終羅馬都係意甲勁旅之一，以試陣為主嘅紅軍不宜追捧。

    羅馬絕大部分主力都在陣中，迪斯高、沙拿、迪羅斯、艾沙拉維及基達等，當然唔少得“招牌”老將“王子”托迪。羅馬進攻能力相當強，之前兩場熱身賽共攻入對手十九球，雖然對手祇係“二打六”，但證明踢友賽認真程度十足。今場對住話晒都係英超“老字號”嘅利物浦，羅馬肯定加多兩錢肉緊。

    紅軍啱啱先打完場國際冠軍盃對AC米蘭，其中費明奴、古天奴、占士米拿、奥歷基及拉蘭拿等主力都有上陣。不足四十八小時內又有比賽，為免球員勞損，今仗應該稍作輪休。另外，球隊今季人腳變動相當大，球員短時間内難以磨合。相反，羅馬一眾戰將夾慣夾熟，組織配合比紅軍較強，羅馬坐和望贏。

    推介：羅馬2:1