聖日門掃“皇”

     國際冠軍盃明早好波連場，先有皇家馬德里撼巴黎聖日門，跟住有拜仁慕尼黑戰AC米蘭，最後係英超版紅藍會，利物浦對車路士。阿Ben一次過推介三場畀大家。

    皇馬陣容一向超級強大，可惜今次加拿大集訓有C朗、摩特歷、巴利及卻奥斯等球星仍在休假，中前場攻力削弱不少。衆星缺陣唯有靠賓森馬與摩拉達“孭飛”，但中場欠缺組織能力下，銀河艦隊今場實在不宜追捧。

    聖日門陣容相當完整，卡雲尼、迪馬利亞、史譚保利、馬杜迪及泰亞高施華等球星全部歸位，上仗對住國際米蘭佔盡優勢，結果輕取三比一，狀態不俗。新加盟嘅賓艾化、蒙尼亞及古庫都有出色發揮。以聖日門目前狀況，絕對有力撼低皇馬。

    拜仁之前三場熱身賽取得全勝，狀態似乎操得七七八八，三戰攻入八球，證明有足夠火力殺敗今場對手AC米蘭。AC在意甲已失去勁旅本色，球隊戰鬥能力大減，今時今日要與拜仁比拼，好似未夠班。

    車路士與利物浦雙方都並非以最強人腳出擊，寓賽於操，相信戰果重要性不大，和波合理。

    推介：巴黎聖日門1:0；拜仁慕尼黑3:1；車路士0:0