祖記“勝”券在握

    今日繼續推介國際冠軍盃，由澳職聯球隊墨爾本勝利對意甲王者祖雲達斯。兩地足球聯賽水平都有一定差距，墨爾本勝利係上季澳職聯賽亞軍，惜在今季亞冠盃在分組賽已出局，證明整體戰鬥力有限，要向歐洲頂級球會挑戰，明顯未夠級數。

    祖雲達斯貴為意甲五連霸，實力無需多講，陣中球星亦街知巷聞，雖今次遠征有多名國腳級球星仍未歸隊，但本身班底球員質素一樣極具份量，對住墨爾本勝利夠殺有餘，祖雲達斯應可勝券在握。

    墨爾本勝利陣中稍為人知嘅球星係前澳洲國腳湯臣，不過呢位老將經已卅八歲，另外，曾效力國際米蘭嘅華利尼、新西蘭國腳巴巴路薩斯及阿爾巴尼亞前鋒比利沙是隊中主力。講到人腳平均實力，點秤都難以與意甲班霸相比，但始終屬熱身賽性質，祖記主帥艾歴尼以操狀態及試陣為目的，墨爾本勝利但求輸少當贏。

    祖雲達斯今場係開操後第一場熱身賽，球隊應未在最佳狀態中，但辛特路、路根尼、靴蘭尼斯及新援賓拿迪亞等級數十足，贏個人技術質素，足以殺敗今仗對手。

    推介：祖雲達斯2:0