紅魔鬼驅“蜂”

    國際冠軍盃中國站今晚開打，紅魔鬼曼聯在上海灘頭挑戰德甲勁旅多蒙特。

    老摩入“魔”後首場熱身賽旗開得勝，兩球淨勝韋根，今場對住實力較強嘅多蒙特，亦係“試刀”最好良機。雖則伊巴謙莫域未能隨隊訪華，但紅魔鬼依然有足夠實力乘勝追擊。皆因多蒙特有更多主力缺陣，今次單靠奥巴美揚、阿祖安拉莫斯及舒美沙“孭飛”，整體戰力削弱唔少，一向唔衰得嘅老摩定要贏波攞彩。

    由於仍有多名國腳級球員休假，曼聯今次訪華由老將卡域克領軍，馬達、迪比、華倫西亞、梳爾、連加特及新援米希達恩與拜利等一線球員都有隨團出發，相信必會在老摩面前博表現。

    多蒙特今季有好大變動，尤其曉姆斯、米希達恩及蘇保迪三大主力離隊影響極大。雖然加入巴特拉、洛迪、迪比利及美連奴等六名新援，但級數仍有待驗證。加上需要一段適應期，短時間要融合球隊踢法唔易，訪華前最後一場熱身賽不敵德乙球隊慕尼黑1860，表現只屬一般。紅魔鬼中國“粉絲”數以萬計，等於有半個主場之利，值得捧場。

    推介：曼聯2:1