“狐狸”捕“牛”

    之前講過上季英超冠軍李斯特城轉會情況，簽入門將施拿，不過相信只係做舒米高副手，跟住前中後三線分別加入梅沙、文迪與靴蘭迪斯，三位都具有一定質素，要爭個正選位唔難。

    今日要補充，“狐狸幫”今季可能得不償失，上季勇奪球會史上首個最高級別聯賽冠軍，奪標三大功臣必定係華迪、簡迪及馬列斯，可惜今季難再三人行。法國國腳簡迪以三千二百萬鎊加盟車路士，馬列斯亦講明有離隊之心，球會將馬列斯周薪加到十萬鎊，但“馬仔”仍無動於衷，一心傾向踢大球會。只有華迪續約，不過預料將會損失兩名親密戰友。

    “馬仔”若離隊影響極大，呢位阿爾及利亞國腳上季為李斯特城在聯賽攻入十七球及十一個助攻，絕對係球隊進攻核心，雲尼亞里要留住“馬仔”都幾頭痛。

    李斯特城明晨將與英甲球隊牛津聯拍跳，話晒都係英超冠軍，始終具有相當實力，而牛津聯上季由英乙升上英甲，戰鬥力有限。李斯特城雖有主力仍未歸隊，但對住低兩級球會，夠殺有餘。

    推介：李斯特城3:1