拜仁曼城和波格

    明晨有場重量級友誼賽，由拜仁慕尼黑對曼城。兩隊都係歐洲名牌球會，邊隊輸都冇面子。尤其兩位教頭，哥帥帶兵倒戈，安帥又剛接手拜仁，兩位名帥都唔衰得，最好和氣收場皆大歡喜。

    安帥在拜仁上任後，今仗係第二場熱身賽，首場對住德丙球會仔，在大部分主力缺陣下，只能僅勝四比三，久休復出嘅洛賓再度受傷，又要缺席季初比賽，呢場友賽認真玩出禍。

    值得一提，拜仁條防線都算踢得差，竟然被丙組仔攻入三球，防守好有問題，雖然今場對住曼城安帥會執正位置，但曼城鋒線有一定級數，好大機會大手交易。

    今場係曼城開操後第一場熱身賽，雖然同樣有多名球星未歸隊，但有兩名新加盟的根度簡與辛尼真高初試啼聲，仲有費蘭度、伊恩祖拿、邦尼及文加拉等一線球員，在新教頭哥帥領軍下，定必施展渾身解數，博能在新一季上位。

    即使雙方未能夫添上陣，但實力唔會相差太遠，况且只屬友賽性質，避免有損傷出現，大家拼搏程度肯定有所保留，今場和波最合理。不妨敲和兼捧入球開大。

    推介：和波2:2