葡萄牙讓波No“威”

    歐國盃今個星期進入結局篇，最後三場大戰後，今屆歐洲王者誰屬自有分曉。

    明晨葡萄牙與威爾斯率先火併爭入決賽。牌面上，葡萄牙可能稍為睇高些少，但殺到入四強根本無弱隊，葡萄牙由分組賽到八強的五場比賽中，表現差強人意。反觀威爾斯越踢越醒神，殺敗比利時後更加士氣高昂，根本未驚過葡萄牙。初盤葡萄牙讓半球，氣勢較佳嘅威爾斯有力埋“牙”。

    葡萄牙上場又死過翻生，逼和波蘭，最後在互射十二碼氣走對手。葡兵確係有運，但單靠運氣當然唔掂，葡兵整體發揮依然未盡人意，尤其前線進攻銳利度不足，實際上仍靠C朗支撐大局。踢足五百一十分鐘，球王要發揮出最佳狀態確成疑問，始終對手威爾斯嘅英式踢法以快搶為主，且反擊效率相當高。信不信由你，葡兵防線有計時炸彈柏比，對住速度與技術並重嘅巴利，柏比極可能成為今仗最大致命傷。

    威爾斯對住比利時同樣落後一球，但威爾斯嘅反撲令到比利時陣腳大亂。值得一提的是，威爾斯五場比賽場場有波入，共攻入對手十球，殺傷力足以撼低葡萄牙。

    推介：威爾斯 2:1