法國“冰”封三尺

    歐國盃八強最後一場比賽，明晨三點開戰，法國在自己地頭迎戰“冷”味十足嘅冰島。相信全世界都會睇高法國會順利殺入四強，但又係個句，“波係圓嘅”，球證一日未“吹雞”完場，都未知邊隊會勝出。

    人口只得澳門一半左右嘅冰島首次踢歐國盃決賽周就能入到八強，的確令球迷驚喜。踢波最緊要有士氣兼食住個勢，既然可以殺敗一級強隊英格蘭，冰島又何懼東道主？落到場毫無壓力踢出鬥心，冇話輸硬。初盤法國讓一球／球半，仍未踢出霸氣嘅法國至少要贏兩球亦非容易，不妨博冰島再踢場好波。

    法國上場力壓愛爾蘭，攻勢排山倒海，全場廿四射十中目標，但亦只能險勝二比一，反映出法國進攻銳利性仍有不足之處，能夠反勝愛爾蘭全憑基士文及時回勇。做出靚助攻嘅基奥特表現仍可以，至於由保羅普巴、簡迪及馬杜迪所組成中場線，渗透力度依然有限，今仗要攻破必定以穩守為主嘅冰島，法國鋒線再受考驗。

    冰島在決賽周四場比賽仍保住不敗身，士氣波好緊要。只要繼續踢出球隊風格，就算一球小敗於法國，球隊亦雖敗猶榮。

    推介：法國2:1