威爾斯受讓有“利”

    今屆歐國盃表現仲勁過“大佬”英格蘭多多聲嘅威爾斯明晨在八強出擊，挑戰歐洲紅魔比利時。除陣中球員星味不及比利時外，其他唔覺威爾斯有任何輸蝕，講拼勁與鬥心，威爾斯更強。初盤比利時讓半球／一球，諗都唔使諗，捧硬威爾斯有“利”可圖。

    無可否認，威爾斯主要靠核心巴利撐起成班波，但唔好忽略藍斯、祖亞倫及禾基斯一樣有份量，最重要就係整隊夠齊心。兩隊在外圍賽曾同組，當時兩度交手，威爾斯取得一勝一和，今場淘汰賽一場過，在心理上，球員作戰心態都比較佔優。

    連續三場戰勝對手，攻入八球兼保持不失，比利時的強勢確相當兇猛。但唔好忘記十六強對手匈牙利條防線係弱不禁風，且匈牙利亦有唔少埋門威脅，若非門將高圖爾斯左飛右撲保住大門，比利時未必贏得咁順暢。今場更有後防大將華美倫停賽，防守力受到一定影響。相信比利時都會採取主攻，但亦要防範威爾斯嘅反擊能力，始終巴利個人速度與技術極具威脅，比利時防線隨時中招。預料九十分鐘內，兩隊未必能夠分出勝負。

    推介：和波1:1