烏圭誓上“委”

    烏拉圭在美洲盃C組首戰出師不利，以一比三敗於墨西哥腳下，餘下兩戰認真要步步為營，否則要殺入八強凍過水。特別係明晨對委內瑞拉，對烏拉圭嚟講屬於一場生死戰，和波都要睇人面色，此戰非要上“委”不可。

    委內瑞拉上仗險勝牙買加，攞到最基本的保險三分，今場和波都處於有利位置。但從上仗所見，整體戰力只屬一般，若非踢多一人都幾難戰勝牙買加，三分叫做執返嚟。今仗對住平均實力在自己之上嘅烏拉圭，委內瑞拉應該冇咁好彩。初盤烏拉圭讓半球，捧硬爭勝決心十足嘅烏拉圭必勝無疑。

    烏拉圭輸畀墨西哥有三大因素，首先四分鐘就輸一個“烏龍波”，令全隊陣腳大亂；跟住半場又踢少一人，球隊更處於下風；最慘係超級射手“牙擦蘇”因傷缺陣，攻力確實大大削弱。但總括嚟講，整體發揮依然具強隊本色，祇要今場繼續踢出風格，應可取得開門紅。

    委內瑞拉基本上由三名在歐洲搵食球員支撐球隊，包括西布朗射手朗頓、在意甲效力嘅連干及馬天尼斯，平均戰力恐難抗衡烏拉圭。

    推介：烏拉圭2:1