哥倫比亞劏“圭”

    哥倫比亞在美洲國家盃旗開得勝，兩球淨勝東道主美國，全隊發揮可圈可點，甚有冠軍相，明早繼續乘勝追擊，對住以新丁為主嘅巴拉圭，一於食返個哥倫比亞“圭”苓膏。

    隨着辛達告鲁斯、巴里奧斯及辛坦拿等老將退役後，巴拉圭加入唔少年輕球員，從上場悶和哥斯達黎加所見，球隊的確缺乏老練，特別在進攻層次上，埋門威脅少之又少，根本毫無殺傷力，今仗對住有多名球星坐鎭嘅哥倫比亞，未打已經先輸大戰經驗。初盤哥倫比亞讓半球，計前線入球能力，哥倫比亞絕對優勝，且近三次對戰，哥倫比亞三殺巴拉圭，今場繼續再送對手“圭”西。

    哥倫比亞陣中擁有洛迪古斯、巴卡、梅里路、沙柏達及古亞達度等星級球員，前中後三線都具一定份量，上場對美國，十二次攻門七中目標，哥倫比亞攻勢確實下下到肉，雖然賽前傳出洛迪古斯有傷，今仗未必可以上陣，但火力依然夠猛，要贏一或兩球問題不大。

    至於巴拉圭上場悶和哥斯達黎加，講都唔信，全場只得一次射中目標，今次對住南美剋星，睇怕以守代攻，但恐怕失波是遲早問題。

    推介：哥倫比亞：二比〇