比利時球半被高估

    有歐洲紅魔之稱嘅比利時被譽為今屆歐國盃黑馬分子，原因比利時近年精英輩出，唔少球星打響名堂。

    冇錯，球隊戰鬥力近年的確不斷提升，但個人認為，比利時陣中球星技術儘管具一定質素，但表現太過個人化。足球比賽講求團隊，整體發揮最重要，比利時要與西班牙、德國及法國等列強相比，似乎仍有些少差距。上場友賽對住芬蘭唔輸都算好彩，今晚最後一場熱身賽搵咗挪威拍跳，初盤比利時要讓一球／球半，以球隊埋門把握力，要贏對手兩球唔易，隨時贏波輸盤，不妨考慮下盤挪威有“利”可圖。

    比利時上仗對芬蘭精銳盡出，夏薩特、費蘭尼、盧卡古、迪比利等強陣出擊，場上確實佔優，更多達卅五次攻門九中目標，惜大部分攻勢好睇唔好食，最終只得一球進賬逼和對手。當應付對方穩守突擊，防線顯得手忙腳亂，無論進攻與防守，比利時仍有太多不足之處。

    挪威只差一步就能殺入歐國盃決賽周，可惜在附加賽不敵匈牙利，相對比利時嘅實力，挪威唔會相差太遠，今場勝負限於一球上落。

    推介：比利時2:1