德軍要“匈”狠

    自從踢完歐國盃外圍賽後，世界冠軍德國近四場友誼賽有三場係輸波，所以話德國踢熱身賽認真靠唔住。上場對住三線球隊斯洛伐克，主場竟然輸一比三，簡直輸死人。呢班德國大帝果然有希特拉風範，夠晒“毒財”。

    德軍明晨又有得玩，今次搵來匈牙利拍跳，由於係決賽周前最後一場演練，日耳曼軍係時候認認真真踢返場好波，對球迷有所交代。

    匈牙利在附加賽兩回合雙殺挪威，四十四年後再度踏足歐國盃決賽周。以球隊本身戰力，相信在決賽周期望亦唔大，首要希望能夠在分組賽突圍。至於講到與德國實力比較，至少差一兩班波唔誇大，問題係德國今仗夠唔夠兇狠。初盤德國讓球半，今鋪捧硬德軍“匈”有成竹，至少贏兩球。

    對住斯洛伐克，路維目的志在試人唔試陣，鐵膽主力包括梅拿、奥斯爾、舒雲斯迪加、曉姆斯及門將紐尼亞等多名“大哥級”休戰，但估唔到會輸到一比三咁肉酸。路維要挽回面子，今仗料會精英盡出，以一場勝仗起航。

    匈牙利人腳級數難與德國相比，今場死守為主，只望輸少當贏。

    推介：德國2:0