受讓一隊去“馬”

    歐洲王者之戰明晨在意大利米蘭展開爭霸，兩支西甲雄獅踩過界，皇家馬德里火併馬德里體育會，爭奪成為今屆歐洲之王。

    講歐冠威水史，皇馬最威十次奪冠，任何一支歐洲勁旅都要行埋一邊。馬體會更拍馬都追唔上，只能兩次屈居亞軍，其中一次在一四年決賽，就係被皇馬在加時擊敗，呢個仇記到今時今日，馬體會今仗非報不可。初盤皇家馬德里讓平手／半球，“大圍”都擺到明唔夠膽讓多，證明對皇馬贏波信心亦不足，不妨捧馬體會掃“皇”成功。

    講牌面，皇馬始終勝於馬體會；但講到近年對賽戰績，皇馬確實處於下風。今季聯賽對陣，作客贏唔到冇得好講，但主場竟然輸埋畀對手。唔計歐冠盃在内，皇馬近八次對住馬體會未贏過，當中更輸咗五場，唔多唔少都有啲心理影響。

    馬體會班波屬於爛仔格，踢法硬朗，波到人到兼腳腳七注就係馬體會風格，勝在實而不華。阿Ben並非主張打茅波，只係足球比賽元素之一，皇馬班星級球員受制於對方腳下亦難怪。加上馬體會本身球員質素亦非泛泛之輩，確有一定贏波能力。

    推介：馬德里體育會一比〇