兩“加”起個孖

    美洲金盃賽B組最後一輪，介紹個孖寶畀大家，牙買加搭哥斯達黎加，二比○波膽過關都幾和味。

    頭場牙買加對薩爾瓦多，牙買加雖然上場僅一粒絕殺楓葉國，但全場廿一次攻門六中目標，完全佔據上風，贏波相當合理，今仗乘勝追擊，對住攻力不足、防守力弱嘅薩爾瓦多，牙買加誓要爭取連勝，以首名晉級八強。

    薩爾瓦多近十年來從未贏過牙買加，近三次對陣亦輸波收場，實力明顯遜於對手。初盤牙買加讓平手/半球，捧牙買加“薩”得“勝”起。尾關哥斯達黎加對加拿大，呢場生死戰邊隊贏波就可以殺入八強。和波都要出局嘅加拿大，今仗擺出搏殺格，有前冇後打死罷就，可惜鋒線過於薄弱，防線定必出現唔少漏洞。

    哥斯達黎加上仗完場前被薩爾瓦多逼和，未能提早殺入八強經已谷住道氣，避免夜長夢多，今仗贏波出線最實際，擁有拜仁雷斯、祖爾甘保及拉美尼斯三大攻擊手，火力肯定在加拿大之上，整體實力亦平均得多，係時候打開勝利之門。初盤哥斯達黎加讓半球，今場冇得“大”意。

    推介：牙買加2:0

     哥斯達黎加2:0