愛華頓迫爆“廠”

    英超今晚早場上演“藍打紅”，愛華頓主場戰阿仙奴。聯賽經已無憂無慮嘅愛華頓今季目標應該放在足總盃上，聯賽只係力爭上游，球員落場可以盡情發揮，相信整體表現會更加出色。

    先後在足總盃與歐冠盃出局，阿仙奴唯一要爭就係英超錦標，可惜與榜首嘅李斯特城相差十一分，奪標機會比較渺茫，目前最緊要係保住前四，搶分積極性肯定比愛華頓更強。但呢粒“拖肥糖”絕對唔易啃，要攞足三分並不容易。初盤平手，不妨捧有主場之利嘅愛華頓。

    愛華頓上仗在足總盃輕取車路士，緊迫踢法令到車仔處於下風，攻擊手盧卡古表現搶鏡。其實不只“小魔獸”把握力強，巴克利與連儂等都有一定入球能力，難怪愛華頓入球數字多達五十球有多，今場入球數隨時又開“大”。

    連續幾個星期一周雙賽，阿仙奴賽事實在太頻密，今仗已是今個月內第六場比賽，剛剛又從西班牙偃旗息鼓回朝，球員體能肯定受到影響，撞啱今場對手愛華頓壓迫性打法，阿仙奴實在不宜高估。

    推介：愛華頓2:1