馬體會誓搶“芬”

    歐冠盃明晨又繼續上演十六強次回合比賽，首回合作客摸和PSV燕豪芬嘅馬體會，今戰返到自己主場有望搶“芬”成功，昂然殺入八強。

    燕豪芬在首回合主場踢少一人情況下，唔輸都算好彩，雖然捱到不失，但球隊在各方面明顯都稍遜於馬體會，假如今仗作客能夠擊敗對手，都叫做爆大冷，阿Ben絕對唔睇好燕豪芬可以過到呢一關。初盤馬德里體育會讓一球/球半，“大圍”對馬體會贏波充滿信心，問題係能否贏波贏盤？上場又大勝拉科三比○，已經連續三場攻入對手三球，球員腳風順到不得了，不妨照捧馬體會波盤全收。

    馬體會近期狀態值得信賴，聯賽取得四連勝，球員都保持一定水準，特別一提兩名年輕戰將尼古斯與哥利亞，令球隊銳利性加強，再加上基士文嘅入球能力，馬體會贏波有保證。

    燕豪芬想要衝入八強，今仗一定要取得入球；不過，要攻入全西甲防守力最強嘅馬體會，實在相當困難，保住不失更為上策，但萬一失手，祇怕大門一江春水向東流。

    推介：馬德里體育會二比〇