“李城”誓闖“卡”

    英超明晨上演獨腳戲，片名《龍頭對鳳尾》，“一哥”李斯特城主場迎戰救亡十萬火急嘅紐卡素。

    李城為向首個英超冠軍邁進，誓必全力撲擊對手，呢三分志在必得。紐卡素生死存亡，就要睇新接任嘅教頭“肥賓”能否令球隊起死回生。不過，一揸旗就要挑戰榜首，球隊本身人腳特性根本都未摸清，真係要睇“肥賓”到底有乜“把炮”。初盤李斯特城硬讓一球，李城係目前英超入球最多，紐卡素就係失球數最多其中一隊，當然捧李斯特城食“素”咁食。

    聯賽只剩九輪賽事，李斯特城距離錦標越來越近。能夠長期保持前列位置，證明球隊並非亂打亂撞“虛火”，球員實力亦得到肯定，唔單只馬列斯、華迪及岡崎慎司水漲船高，中場硬漢簡迪亦受到法國國家隊及倫敦兩大球會車路士與阿仙奴注視，連前德國國腳侯夫同樣鹹魚翻生。冇真正嘅實力又點會在“一哥”個位企得咁耐。

    紐卡素近七場作客輸足七場共失十四球，平均每場失兩球，唔好話搵“肥賓”救亡，實在神仙都難救。

    推介：李斯特城2:0