水晶宮夠“雷”氣

    足總盃八強明晨開打，先由兩支冷門分子對陣，英冠中下游球隊雷丁與英超嘅水晶宮爭入四強。雷丁雖然在次一級踢英冠，但上一圈淘汰另一英超球隊西布朗，所以話足總盃確係爆冷溫床，不過踢到八強階段，始終講求真正實力有幾多，睇雷丁在英冠排名及人腳名單，似乎唔突出得去邊。

    水晶宮在英超已連續十二場不勝，不過在足總盃就連過三關，分別擊敗修咸頓、史篤城及熱刺三隊硬嘢，其中兩場踢作客，好明顯專攻足總盃。今場對住實力比前三隊較弱嘅雷丁，水晶宮勝算依然較高。初盤水晶宮讓平手／半球，捧水晶宮可將對手“丁”走。

    雷丁陣中有唔少外援，有來自巴西、荷蘭、法國、葡萄牙及美國等，都算係聯合國部隊，可惜名氣與質素方面祇屬一般，有料的話，亦唔使在英冠排到去十四位。水晶宮擁有艾迪拜約、卡比耶、基利、李青龍及查馬克等多名英超球星戰將，平均戰力絕對在雷丁之上，祇要整體發揮出應有水準，水晶宮可殺入四強。

    推介：水晶宮1:0