哈化發奇兵襲“堡”

    德甲“老三”哈化柏林今晚出征漢堡，為坐穩第三位而戰。哈化柏林近況唔錯，而且往績方面亦有優勢，雖然今晚作客出征，仍然有望可以凱旋而歸。

    哈化柏林今季表現唔錯，目前廿四戰十二勝六和，手執四十二分佔據第三位，與第四的慕遜加柏有四分差距，絕對有機會參與明年的歐冠賽事。雖然球隊季初一度低迷，曾經有連續五場不勝的紀錄，不過球隊近況好轉，最近兩輪聯賽先後擊敗科隆及法蘭克福，斬獲三球之餘一球未失，攻防兩端都有不錯的表現。賽至目前為止，哈化廿四仗失廿四球，防守表現排聯賽第二。雖然進攻方面與多蒙特及拜仁等勁旅有差距，不過鋒將卡羅奧腳風頗順，最近三輪聯賽斬獲兩球，狀態有一定保證，今晚有望為球隊建功立業。

    漢堡主場亦唔掂

    漢堡近況與哈化柏林天淵之別，由去年十二月至今只贏一場，球隊士氣陷入谷底，加上之前六次與哈化交手輸足五場，輸波的五仗更是一球未入，球員心理包袱頗大。值得一提是球隊今季聯賽主場只贏三次，今晚即使坐擁主場之利，亦難逃主場淪陷。

    哈化柏林主帥達戴爾希望球隊延續勝軌：“球隊最近的表現唔錯，已經連續兩場在無失球的情況下贏波，我希望之後會有第三場，甚至第四場。雖然我們過去多次在漢堡身上取得勝利，但絕對不能夠掉以輕心，我希望球員可以盡最大的努力，在場上爭取好成績。”