加拿大冇“牙”力

    加拿大係今屆美洲金盃賽東道主之一，首戰對住同組較弱嘅薩爾瓦多，以為有天時地利人和就可以旗開得勝，可惜由於質素所限，只能與對手摸和。餘下兩場對牙買加與哥斯達黎加，加拿大要出線入八強，機會都係五十五十。特別明早對住牙買加，真係一分都不能再失。

    加拿大由於有貝尼亞、赫捷臣及亨利三大外流主力未有歸隊，戰力無疑受影響，尤其前鋒線欠缺埋門一腳，今仗要戰勝對手全取三分實在不易。

    牙買加第一場對住哥斯達黎加表現的確令人驚喜，部分球員個人技術質素絕不簡單。尤其攻入第二球嘅麥安拿夫，爆炸力突出，加上麥奇利、馬里亞柏及摩根三名英超兵，再配合多名在美職聯搵食球星，牙買加整體戰力實在不能低估，難怪在美洲盃對住阿根廷、烏拉圭及巴拉圭三支南美一線球隊，都只係一球落敗。

    如果計前中後三線實力，牙買加應比加拿大更加平均，相信今仗可以打開勝利之門。初盤牙買加讓平手／半球，捧牙買加贏波十“拿”九穩。

    推介：牙買加2:0