巴塞一切從“簡”

    西甲已剩十二輪比賽，排榜首嘅巴塞已拋離第二嘅馬體會有八分，如無意外，衛冕聯賽冠軍高唱入雲。

    雖然奪標在望，但巴塞肯定唔會放軟手腳，皆因仲有好多嘢要做，例如教頭安歷基要為球隊打破卅四場不敗紀錄，射手“哨牙蘇”繼續要爭取“士哥”，誓要成為今季神射手，隨時攞埋歐洲金靴獎就更完美。明晨對住低一班波嘅華歷簡奴，巴塞又係“開大餐”時候。

    排第十六仍在護級漩渦掙扎嘅華歷簡奴，依然未脫離危險期，場場波都要搏命搶分。不過，今仗應該都打定輸數。因近十次對住巴塞輸足十場不特止，總共失四十五球，平均每場失四球半，對住巴塞好似任由宰割一樣。華歷簡奴目前係西甲球隊中失球最多一隊，防守能力弱到“打冷震”，又點頂得住被譽為全球最強嘅MSN攻擊組合。華歷簡奴唯有寄望今仗在主場將傷亡數字減到最低，不至於在鄉親父老面前慘敗收場。初盤巴塞羅那讓兩球／兩球半，一於照捧巴塞贏盤又贏波，一定冇奔波。

    推介：巴塞羅那4:0