紅魔鬼耍花“槍”

    今晚英超又有好戲睇，曼聯與阿仙奴兩支歡喜冤家又聚頭。曼聯目前排第五，與第四位嘅曼城只有六分之差，絕對唔會放棄爭上前四的機會，加上首循環慘吞阿仙奴三蛋，今場有仇不報非“紅魔鬼”。

    阿仙奴落後榜首李斯特城兩分，同樣繼續要為爭標而搶分。球隊近期表現較為飄忽，先在足總盃被英冠球隊侯城悶和，跟住歐冠又不敵巴塞，連續兩仗主場冇波贏兼冇波入，今仗作客對曼聯更加唔易踢。初盤仲要讓平手／半球，又憑乜嘢讓得起？一於捧硬紅魔鬼主場爆“廠”。

    曼聯近兩場終於魔性大發，足總盃與歐霸盃都炒起對手，兩場波共攻入八球，成隊波似返個“魔”樣。不過，目前傷兵依然嚴重，至少有八個係一線球員。但球隊最緊要踢得順，且有主場之利，絕對有機會報回首循環慘敗之仇。

    阿仙奴目前陣容較為完整，只有張伯倫對巴塞時受傷，今場肯定缺陣。阿仙奴接下嚟嘅比賽密度密個蜜蜂竇，由今戰開始至下月十九日，平均每三日要踢一場，確受極大考驗。至於首循環對曼聯一戰，阿仙奴優勢實在唔多，只係把握較佳，今仗未必咁好彩。

    推介：曼聯2:1