皇馬讓波難“體”好

    西甲今晚上演“雙馬會”，皇家馬德里火併馬德里體育會。由於兩隊落後榜首巴塞羅那有八、九分距離，所以今場對“兩馬”爭標形勢相當關鍵，輸波一隊應該可以宣佈棄權，和波亦可以話兩敗俱傷。呢場馬德里市內戰隨時傷亡慘重。

    今戰亦屬矛與盾之戰，皇馬係西甲攻擊力最強球隊，聯賽攻入七十一球，C朗與賓森馬兩大攻擊核心包辦一半入球有多。不過“賓哥”有背傷，今戰能否復出仍是未知數，幸好仲有洛迪古斯及謝斯等攻擊手，火力依然強橫。然而，你有最鋒利嘅矛，馬體會亦有最堅硬嘅盾，廿五場聯賽只失十一球，由哥甸領軍嘅防線非常穩固，今仗踢作客更加以穩守突擊為主。

    至於雙方對賽往績，馬體會有較大優勢，近十次對戰曾四次擊敗皇馬及和五場，只輸過一場咁大把，心理上亦有一定着數。睇返首循環碰頭，馬體會射門次數多皇馬一倍，證明兩隊實力並非有太大差距。雖然今場馬體會作客，但初盤受讓半球／一球，馬體會值得一博。

    推介：和波1:1