米堡作客照收“斯”

    今日推介場“公仔箱”有得睇嘅英冠畀大家，列斯聯對米杜士堡。列斯聯目前排英冠中下游位置，比上不足比下有餘，要爭上前六位博升班機會唔大，降班又唔使憂，可以大踢風流波。

    講爭勝決心，米杜士堡積極性一定相當強烈，事關聯賽榜第二位嘅侯城剛擊敗布力般升上榜首，米堡要重奪“一哥”之位，今仗必要全取三分。球隊首循環曾以三球大勝列斯聯，今場雖然踢作客，但仍有一定心理優勢。初盤米杜士堡小讓平手／半球，米堡值得捧場。

    列斯聯今季主場戰績只係差強人意，十五場輸多過贏，反映球隊真正實力並非強橫。尤其在攻擊力方面，主場只得十二球進賬，係英冠中攻力最差之一，至於防守能力亦屬有限公司。攻不銳守不穩，難怪球隊只能排低下層位置。

    米杜士堡為要重返英超，今季整體人腳有所加強。達美亞與艾耶拉兩名西班牙援將具一定份量，仲有烏拉圭前鋒史杜安尼及一月份由修咸頓借用嘅拉美尼斯。平均戰力絕對在列斯聯之上，今仗有望再次戰勝對手。

    推介：米杜士堡2:1