希杭主場要“簡”

    西甲榜尾形勢七國咁亂，由十一位嘅皇家蘇斯達開始數落，十隊波依然有降班威脅。明晨有場單打獨鬥，由希杭對華歷簡奴，為保住甲組席位又要打生打死。

    希杭目前有廿二分排十六位，與在降班線嘅拉斯彭馬斯只有一分之差，隨時都要跌落降班區，非要搏命搶分不可。華歷簡奴亦只係多希杭一分，同樣都要擺出搏殺格，今戰唔係你死就係我亡。和波的話，分分鐘兩忘煙水裡。

    以兩隊人腳比較，個人較為睇好希杭，皆因陣中多名年輕球員極具潛質。包括巴塞三名青訓產品卡蒙拿、夏利奴域及辛拿比亞，已成為球隊核心。冬季新簽入嘅波斯尼亞國腳雲積斯及智利小將列治洛夫斯基，肯定能加強戰鬥力。加上有主場優勢，對住同級波嘅華歷簡奴，應可睇高一線。

    華歷簡奴屬於一支有前冇後、打死罷就嘅球隊，數榜尾球隊中都有一定入球能力，可惜失球數字亦係西甲中最多，且作客成績僅得一勝三和七負，完全冇保證。初盤希杭讓平手／半球，捧希杭穩勝。

    推介：希杭2:0