雙城會睇好“李”

    今輪英超上演榜首大戰，落後三分嘅曼城火拼李斯特城。“藍月亮”只要贏波，即可憑得失球優勢佔據榜首，爭勝決心無需多講，以整體戰力計，曼城確實比李斯特城較強。不過，阿Ben比較喜歡捧有士氣又有氣勢嘅球隊，加上李斯特城充滿鬥心，只要踢出拼勁，作客亦未必輸得晒。初盤曼城讓一球，不妨博李斯特城力保不敗。

    計埋足總盃，曼城取得三連勝，近況都踢得幾順，已經七場未輸過，只係間中發揮較為起伏，踢唔出真正超強勁旅本色。可能目前爭標形勢實在太緊湊，如果你話冇壓力就假。尤其今場關鍵之戰，對曼城嚟講更加唔輸得，來回等於六分波，確要睇球員心態及臨場發揮。

    相反，李斯特城踢到今時今日，已經取得在英格蘭最頂級聯賽中最佳成績，球隊嘅鬥志已去到頂點，最終能否勇奪英超冠軍根本係後話，最重要係每場比賽都竭盡所能。正如上場殺敗紅軍一樣，士氣如虹。當然，李斯特城最近一次擊敗曼城係十幾年前的事，但唔代表會輸硬畀對手。

    推介：和波1:1