西維爾斬瓜“切”菜

    西班牙盃明晨繼續有四強首回合上演，近期“弗”到“嘭嘭聲”嘅西維爾主場火併切爾達，實力之戰極具睇頭。

    西維爾近九場取得八勝一和，只係作客摸和馬體會，狀態如日方中。更加得人驚係連續十一仗主場橫掃對手，強如皇家馬德里、祖雲達斯及華倫西亞等勁旅都要俯首稱臣。今場對住實力相若嘅切爾達，西維爾依然勝算較高。

    切爾達今季發揮同樣四平八穩，尤其在上周中八強戰作客淘汰馬體會，表現簡直令人驚喜。不過，聯賽剛被拉斯彭馬斯完場前反勝，恐怕被打窒條氣，今仗對住主場窮兇極惡嘅西維爾，切爾達但求保住首回合不敗。初盤西維爾讓半球／一球，推介西維爾至少可執半個盤。

    西維爾十一仗主場全勝之餘，共攻入廿四球，場均入兩球以上；防守方面，其中有八場保持不失球，攻守兩端都踢出極高水平。

    至於切爾達近三場作客，除擊敗馬體會外，其餘兩場分別輸畀華歷簡奴與拉斯彭馬斯兩支榜尾分子，作客踢得較為飄忽，可信程度實在有限。

    推介：西維爾2:0