馬體會多“奴”多得

    西班牙盃明晨踢十六強次回合，西甲領頭羊馬德里體育會對住排尾二嘅華歷簡奴。齋睇聯賽排名已經知道冇得打，何況馬體會仲係主場出擊，除非自動放棄，否則應可重創對手。

    雖然首回合華歷簡奴曾被馬體會逼和，且場上形勢互有攻守，但今仗去到馬體會嘅卡達朗球場，華歷簡奴實在凶多吉少。馬體會主場一向窮兇極惡，華歷簡奴作客例牌軟弱無力，想博大霧都好難。初盤馬德里體育會硬讓球半，要贏波贏盤，直頭係“簡”單任務。

    今場係兩隊短短十五日內第三次碰頭，上月尾聯賽首循環，馬體會作客兩球輕鬆取勝；上周首回合，馬體會同樣作客出戰，但收起唔少主力，部分正選亦只係輪換上陣，基本上半力出擊。既然上場聯賽能夠過關斬將殺敗切爾達，係時候再向西班牙盃埋手，殺入八強志在必得，誓必在主場晒“馬”撕碎對手。

    華歷簡奴九場聯賽作客僅得一勝一和七負，防線共失廿七球，踢作客“流”到不得了，近五次作客馬體會亦全敗，只望今場輸少當贏。

    推介：馬德里體育會2:0