史篤城有力抗“紅”

    英格蘭聯賽盃明晨上演四強首回合，主場極惡嘅史篤城迎戰利物浦。兩隊剛在聯賽都係輸波收場，不過史篤城輸畀西布朗，一來因為尾段踢少一個才導致一比二落敗，二來擺明玩留力，收起唔少主力，明顯全力搏殺呢場聯賽盃。

    至於紅軍輸畀“鎚仔幫”應該心服口服，主要係受傷兵影響，加上多名球員狀態起落不定，搞到克洛普頭都大埋。紅軍接住有足總盃，跟住仲有對阿仙奴與曼聯兩場英超大戰，如何調兵遣將，“克蛇”的確傷透腦筋，何況今場對住史篤城經已係一場惡戰。初盤利物浦仲要讓平手／半球，絕對唔睇好，捧硬史篤城坐和望贏。

    之前都講過，史篤城在自己地頭遇強越精神，曼市雙雄都要成為手下敗將，實際上，史篤城無論正選或替補力，都勝在質素夠份量，所以對住強隊絕不輸蝕，對紅軍根本未驚過。

    利物浦近幾場表現反覆，除球員表現時好時壞外，史卡迪爾、占士米拿及亨達臣等多名主力因傷缺陣亦影響極大，令整體發揮欠缺信心，今戰要攻“城”談何容易。

    推介：史篤城2:1