希杭主場要“加”分

    西甲明晨上演搶分護級戰由希杭對加泰，兩班波實力都屬於低下層，戰力實在有限，且近況又同樣處於弱勢，可以話同病相憐，今仗簡直係“水鬥水”。

    希杭目前形勢比較危險，十六場聯賽過後只得十五分排尾四，與降班區球隊只有一分之差，所以搶分意慾肯定比對手強。惜球隊攻力不足，入球能力相當差，聯賽只入十五球，平均每場入唔到一球。不過，球隊去到現時環境，非要擺大個頭加強鋒力不可，況且今仗對手實力相若，借助主場之利，係搶分最佳時機。

    加泰亦唔好得好多，只係多希杭兩分，今場輸波的話，就要與對手互調位置。加泰最大弱點就係踢作客，今季作客不但未贏過，只和過兩場輸六場，最慘只得入五球，後防失二十球，攻不鋭守不穩，係西甲中最差的一隊，反映踢作客腳軟到不得了。另一作客不利數據，就係近四次去到希杭嘅莫利農球場，加泰一和三負，今場博和攞一分都算執到。初盤希杭讓平手／半球，不妨直博希杭可以小勝對手。  推介：希杭1:0