皇馬贏“蘇”小小

    西甲今晚十一點就有波睇，上場大開殺戒，十比二屠宰對手嘅皇家馬德里繼續主場出擊，迎戰今季失準嘅皇家蘇斯達。理論上皇馬再攞三分絕對冇問題，但能否同上仗一樣，又再將對手殺個屍橫遍地？睇怕今仗冇咁“順攤”。

    皇蘇今季雖然走晒樣，但爛船都有三斤釘，陣中不乏好波之人，祇要踢回水準，皇蘇都係一支具實力球隊。由於目前處於護級邊緣，皇蘇場場波都要搏殺搶分，雖則作客班拿貝球場要攞分實在不易，但依然都要作戰到底，至少唔會任人宰割。初盤皇家馬德里硬讓兩球半，不妨考慮皇蘇輸波贏盤。

    唔好以為皇馬大炒華歷簡奴係贏得轟轟烈烈，上半場十二分鐘，皇馬係先落後一比二，三十分鐘未夠，華歷簡奴已經兩件紅牌罰出場，如果皇馬未能反勝兼大斬對手的話，唔該“肥賓”即刻搵窿捐。再對上一場輸畀維拉利爾，“皇粉”經已發晒爛渣，下半季“肥賓”確要醒醒定定。皇蘇今仗一定打游擊戰，但求搶得一分得一分，可惜球隊狀態一分亦難求，但最緊要贏盤喞。

    推介：皇家馬德里  三比一