阿仙奴“城”事不足

    英超重頭戲安排明晨上演，阿仙奴火併曼城。兩隊實力屬於半斤八両，講狀態，阿仙奴近五戰不敗兼取得四勝；曼城亦唔差，四勝一負。不過，曼城四場贏波都係在自己主場出擊，近兩場作客就輸波收場，今戰去到酋長球場，要再贏有一定困難。同樣，阿仙奴要打敗曼城亦非容易，始終強強對話，雙方都會踢得較為謹慎。初盤阿仙奴讓平手／半球，必捧曼城搶得“仙”機。

    兩隊陣容方面，兵工廠有唔少傷兵，特別是在中場線，山齊士、卡索拉、韋舒亞及阿迪達等都因傷缺陣，只能靠奧斯爾“單拖”鋪橋搭路，令前線搵食相當艱難。

    計中場能力，曼城有杜尼、大衛施華及迪布尼等多名大將，中場線曼城絕對贏晒。此外，射手阿古路今仗可以復出，阿仙奴防線不可不防，雖然近兩場聯賽只失一球，但對手只係新特蘭與維拉，火力難與曼城相比。阿仙奴近三次主場對住曼城未贏過，只係兩和一負，實際上主場冇乜着數，要讓波，幾大都揀曼城，至少可執半球盤。  推介：和波二比二