巴塞玩“大”佢

    世界冠軍球會盃今晚展開另一場四強，由亞洲冠軍廣州恆大對歐洲王者巴塞羅那。

    廣州恆大上仗踢出精彩一戰，以二比一反勝中北美洲霸主阿美利加會，英雄式殺入四強，今場只要殺敗巴塞，便可昂然殺入決賽。不過，機會唔係冇嘅，只係相當、相當、相當“忟水”囉。

    巴塞稱為“地上最強”，目前世界上任何一支最頂級球隊，都未必係巴塞對手，唔怕得罪講句，以恆大嘅整體實力，根本未去到呢個檔次，如果巴塞未能殺到入決賽，顏面何存呢？問題係巴塞會否腳下留情，贏少一兩球當表演性質。初盤巴塞羅那硬讓兩球半，近三場比賽只得個“和”字，今戰都係時候重現霸氣，一於搞“大”佢。

    尼馬有傷在身，今仗上陣機會唔大，不過美斯同阿蘇組合已經足以令恆大防線兵荒馬亂，尤其美斯絕不會放軟手腳，勢必帶領球隊再奪世冠盃，要攞即將頒發嘅金球獎，就事半功倍。加埋恩尼斯達，拿傑迪、艾華斯及馬斯卓蘭奴等世界級球星，恆大能與世界最頂尖球會交手，但求輸少當贏。

    推介：巴塞羅那4:0