槍手登“高”難

    明晨歐冠盃F組有場生死戰，希臘勁旅奧林比亞高斯主場火併阿仙奴。

    先講出線形勢，由於首循環對賽，阿仙奴主場輸二比三，計對賽成績相當不利，所以奧林比亞高斯今仗基本上唔輸過一球以上，就可以與拜仁攜手殺入十六強，阿仙奴要殺出血路，就要贏兩球或以上。

    講真，兵工廠不單在主場輸過畀對手，近三次作客奧林比亞高斯都係落敗而回，今場仲要在極大壓力下爭取出線生機，實在別期望太高。初盤阿仙奴仲要讓半球，除非奧林比亞高斯自動放棄出線權利，否則阿仙奴想贏都難，必捧奧林比亞高斯搶“槍”成功。

    奧林比亞高斯在近七場的各項比賽，只輸過一場畀拜仁，其餘六戰全勝，整體狀態十足，加上有天時地利人和，又何懼兵工廠來襲？阿仙奴近三場作客發揮令人失望，兩場英超先不敵弱旅西布朗，又被諾域治逼和，歐冠盃更加一比五大敗在拜仁腳下，作客表現實在欠缺信心；陣中嘅山齊士與卡索拉兩名大將又因傷缺陣，兵工廠何來贏波能力？

    推介：奧林比亞高斯1:0