美洲盃4強激戰！
美洲國家盃4強賽事聽朝開戰，東道主智利喺聖地亞哥迎戰秘魯，讓1球值得揀1.83倍上盤，畢竟秘魯近4次殺入4強後未試過晉級，簡直好似中咒咁款；相反，智利王牌阿歷斯山齊士連續2次畀對手狂寸，梗係要發奮嚟料幫手入波，話畀大家知，「山神」到底有幾勁啦！（now681台周二早上7:30直播）

秘魯喺1975年第2次奪得美洲國家盃冠軍，之後曾經4次踢到入準決賽，竟然全部出局收場，包括上屆以0:2不敵烏拉圭。雖然秘魯喺8強戰以3:1打沉玻利維亞，荷西古里路更加連中三元威到盡添，但係我又唔信，佢對住智利可以好似鬥玻利維亞咁，繼續如入無人之境囉，就算中場盧巴頓同波爾隆復出，但佢哋都係名不經傳之輩，怕且都冇咩用喎。

智利晉級過程夠晒霸氣
今屆美洲盃主辦國智利，喺晉級過程嘅說服力就大得多，分組賽幾乎玩晒，去到8強亦以1:0氣走烏拉圭，防線相當穩陣。係，你可能會話智利大部分時間都打多個，但只係僅勝1球，表現唔算話特別好，不過大家要留意，其實成場波智利都係控制戰局，由分組賽到8強，佢哋場場波都係壓住對手嚟砌，只要智利肯搏的話，今場要贏2、3粒，查實真係冇乜難度。

秘魯將帥寸對手攞嚟衰
賽前秘魯教頭加雷卡唔識死，竟然話有專門對付智利嘅「武器」，根本唔使驚喎，擺明冇放東道主喺眼內；最好笑係秘魯嘅二打六祖安華加斯，又口響響同傳媒講，話阿歷斯山齊士冇乜特別過人之處，係好普通嘅球員，而且佢哋踢完8強戰後有足夠時間休息同部署，只要踢番自己嘅風格，好有機會搶到決賽席位喎。大家知啦，A山上次畀烏拉圭球員寸已經躁晒，依家對手又火上加油，呢啖氣點吞得落先？查實「山神」今屆美洲盃都冇乜出高速快放，聽朝一於等睇佢出「秘」技發威、幫智利殺入決賽啦！