東西亞土豪對碰
東西亞土豪大對決爆發！今屆亞冠盃決賽首回合，是夜响阿聯酋迪拜上演，2013年盟主廣州恒大淘寶（足智彩譯FC廣州）客場挑戰阿爾阿里，呢兩支億萬大軍雖則火力強悍，但係首回合都想贏怕輸，前45分鐘冇交收唔奇，博吓個2倍半場和無妨。

（now671台周六晚11:45直播）

阿爾阿里下星期香港集訓
大家可能唔知阿爾阿里係乜底細，不過呢隊波好唔簡單，喺阿聯酋皇室撐腰下，舊年冬天同今夏總共使咗4,400萬歐元（約3.7億港元）增兵，收購咗前賓菲加嘅葡超金靴洛迪高利馬、巴西國腳中場艾華頓列比路，仲有去過英超打滾嘅艾薩迪，球員年薪總支出達1億港紙以上，羅馬尼亞籍教頭奧拉羅尤嘅年薪更高達500萬美元，支出同恒大同一水平，公認係今屆亞冠盃拍住恒大嘅超級土豪。只係暫時未知佢哋開出嘅捧盃獎金，有冇恒大嘅2,000萬人仔咁多啫，但按過去經驗，中東啲油王出手肯定有多冇少。

阿爾阿里唔單只投資大，佢哋喺備戰方面同恒大一樣咁豪，除咗大家都用私人飛機接送球員，王儲兼空軍副司令謝赫．穆罕默德．札耶德．納希揚仲計劃用專機送幾百球迷去廣州，為11月21日嘅次回合終極決戰打氣。佢哋又安排隊波响下星期六（14號）提前一個禮拜到香港集訓，謀求適應珠三角地區嘅氣候，決心要响廣州捧走亞冠盃。

恒大亞冠場均失唔夠1粒
由投資到球員實力，阿爾阿里同恒大都係半斤八両，雙方都冇擊敗對方嘅把握。阿爾阿里主帥奧拉羅尤就講明至怕恒大嘅列卡度高拉特、艾傑臣同郜林3個，今場目標係主場唔好失波再求爭勝。咁啱恒大亦都好忌憚主隊嘅攻擊力，而且自從史高拉利執掌帥印之後，呢支中超勁旅非常穩紮穩打，响亞冠盃場均只失0.63球，淘汰賽階段每被射門11.6次先失1球，防守比簡拿華路揸旗年代仲穩陣，即使韓援中堅金英權停賽，都有權响上半場保持不失，半和有得諗。