對於中小型球會嚟講，歐洲賽真係令佢哋又愛又恨。喜嘅梗係貪佢可以名利雙收夠實際，悲嘅自然係球隊人腳不足以應付兩條戰線，好易影響聯賽成績。今季畢爾包就似乎中咗「歐霸盃病毒」，搞到球隊長期排喺聯賽榜下游，呢鋪佢哋主場迎戰作客唔曳嘅希杭竟然讓到一球，1.92倍下盤點計都抵玩。

（now632台周二凌晨3:30直播）

畢爾包季前砌低巴塞隆拿捧走西超盃冠軍，點估到佢哋之後喺聯賽走晒樣，8戰過後只得8分落袋。當中出戰歐霸盃對畢爾包可謂不無影響，佢哋今季4次踢完歐霸盃後，3次喺之後嗰輪聯賽輸波收場。就算呢班波最近連續3場不敗，似乎有啲起色，但都係睇定啲至跟好。

希杭火力勁鬥心強
再講，對手希杭今季作客都叫見得人，4輪聯賽作客僅1敗，輸波嗰場仲只係因為球隊喺上半場打少個，先畀華歷簡奴險勝2:1，證明佢哋作客並唔易啃。咪忘記希杭對上2仗連環喺完場前入波搶分，鬥心同樣冇得頂，加埋佢哋近5戰轟入10球嘅火力，呢鋪對住遠征完塞爾維亞返嚟嘅畢爾包，唔係冇搶分本錢囉。