卡拉巴克長途機坐到攰
至於另一支英超兵熱刺，今晚於歐霸J組主場迎戰阿塞拜疆球隊卡拉巴克。雖然熱刺王牌射手哈利卡尼於國際賽期有士哥，但今季為熱刺上陣賽事仲未開齋，適逢呢組最弱嘅卡拉巴克自動送上門，長途跋涉飛4,000公里踢呢場波，真係未踢已經腳仔軟，「哈利仔」仲唔趁機數胡打破入球荒咩？不妨直取熱刺讓球主勝。

（now 670周五凌晨3時05分直播）

普捷天奴對愛將有信心
熱刺係近年歐霸常客，之前3屆均順利殺入淘汰賽階段，不過今季開咧後表現一般，直至日前聯賽末段靠賴恩美臣一箭定江山，幾經辛苦先擊敗新特蘭打開勝利之門。其中最令人失望嘅係上季轟入31球嘅首席射手哈利卡尼，雖然佢喺9月為英格蘭於歐國外對聖馬力諾同瑞士都有士哥，但今季仍未打破球會級賽事嘅入球荒。不過「哈利仔」表示未擔心過，仲話入波遲早會出現，而且主帥普捷天奴講到明，今仗繼續畀「哈利仔」擔正，擺明對佢信心十足。普帥同時點名提到另一陷於低潮嘅球員拉美拿，除咗話勁信任佢，不忘強調今季對呢位阿根廷同胞非常重要，要用實際行動證明自己，相信拉美拿必定加多兩錢肉緊報答普帥。

來自阿塞拜疆嘅弱旅卡拉巴克，唔單止實力曳爆，佢哋為咗出戰今仗，由首都巴庫飛赴倫敦，途程足足達4,000公里，係首日歐霸賽事入面途程最長嘅作客球隊，舟車勞頓之下，真係未踢已經腳軟。既然卡拉巴克質差兼攰爆，熱刺射手哈利卡尼必定搏甩髀爭取士哥，打破球會級賽事入波荒，熱刺讓球勝有1.72倍非常值博。