祖記吔「烏」雞補身撐「讓主」

意甲開鑼今晚輪到衞冕冠軍出場，祖雲達斯會喺主場迎戰烏甸尼斯，雖然「斑馬兵團」有唔少傷兵，幸好新加盟嘅射手文迪蘇傑據講趕及傷愈可以披甲，加上呢班波又捲入假波傳聞，開鑼戰梗係要省靚個招牌啦，撞正對家烏甸近年頻頻畀祖記恰死，一於博1.72倍「讓主」！（TVB301台周一凌晨0:00直播）

近年喺意甲呼風喚雨嘅祖記，嚟到今季臨開季有前鋒艾華路莫拉達、中場基迪拉、馬治斯奧同卡華禾艾沙姆養傷，幸好佢哋喺放走前鋒泰維斯、中場派路同維達爾後，已經簽番唔少實力戰將，當中前鋒文迪蘇傑同保羅戴巴拿更加喺意超盃入過波。消息話早前操練受傷嘅文迪蘇傑，今戰可以趕及復出，唔使擔心祖記會啞火。

烏甸對賽得1和6負
最近有法國著名經理人响自傳爆料，話祖記專門安排高質素妓女服侍球證，希望落到球場可以攞到着數，甚至連歐聯賽事都會用呢招。眾所周知祖記以前試過畀「電話門」事件搞到雞毛鴨血，如果佢哋唔希望被標籤做假波兵團，睇怕要喺開咧戰贏番場好好睇睇先得。

對手烏甸今季由新教練哥蘭度奧奴領軍，呢班波件主力射手迪拿達利已經「三張有七」，本來係家有一老如有一寶，可惜烏甸近7次鬥祖記得1和6負，畀人恰到上心口，而且又有後衞莫拿華古停賽，唔似有本錢爆冷囉！