謝拉特重生風頭蓋林伯
謝拉特同林柏特呢pair「雙特」用「既生瑜何生亮」嚟形容可謂最適合不過，兩位頂級中場既係摯友，亦係宿敵，多年嚟喺英格蘭國家隊都未能建立默契。今季兩人由英超鬥到美職，「謝四」已經迅速適應美職新生活，但「林伯」受傷患影響，至今仍苦苦掙扎。今場洛杉磯銀河主場對紐約城，銀河主場九連勝，反觀紐約城表現飄忽，讓球主勝值捧。

（周一凌晨3時開賽）

謝拉特當初決定離開母會利物浦加盟洛杉磯銀河，有部分原因係受到林柏特影響，見到老死喺職業生涯最後階段過嚟美職搵食，「謝四」亦心郁郁想試吓喺美國過新生活。結果喺英超已經跑唔郁嘅「謝四」，嚟到壓迫性冇咁強嘅美職，成功搵番自己，踢番自己最適合嘅進攻中場，同老拍檔羅比堅尼非常合拍，助銀河喺西岸攀上榜首。

林柏特有傷上陣成疑
至於林柏特呢，嚟咗紐約城咁耐，就一直受傷患困擾，只係幫紐約城踢咗兩場美職咁多，今場亦唔知可唔可以趕及傷愈復出。銀河主席基斯克萊恩日前承認，喺簽入謝拉特之前，曾經追逐「林伯」多年，依家佢應該慶幸球會得到嘅係「謝四」。紐約城雖然攻力唔曳，但防守實在太差，最近5場美職，有4場係失兩球或以上，今場作客銀河嘅無敵主場，睇怕都係凶多吉少，捧銀河讓球勝！