今晚除咗歐霸做主打外，唔好忘記美洲仲有好多盃賽上演，阿King就睇中聽朝其中一場巴西盃16強首回合，由富明尼斯主場對乙組仔彼辛度，富軍實力贏成條街之餘，仲有啱啱復出即有士哥嘅前巴西國腳費特壓陣，彼辛度未踢已經腳仔軟，不妨直取讓球主勝。（周五早上6時開賽）

巴甲「四哥」富明尼斯之所以被榜首哥連泰斯甩開7分，主因係作客戰績飄忽，導致失分頻頻，相比之下佢哋單計近6仗主場聯賽就贏咗5場，可見富富明尼斯喺自己地頭出擊甚有保證。而且陣中老牌射手費特剛傷愈復出，日前對費古倫斯更射入反先嘅士哥，雖然佢以前喺巴西國家隊被嘲笑為「廢特」，但以其級數踢國內聯賽游刃有餘。彼辛度喺乙組只排第7，難以同富明尼斯相提並論，加上佢哋之前7場作客全部輸晒，難得遇上呢支「作客蟲」，費特仲唔趁機數胡咩，讓球主勝有1.95倍值博。

阿古拿斯再追半場和
至於南球盃首圈次回合，秘魯哥梅里卡奧主場出戰哥倫比亞阿古拿斯，後者首回合贏2比0，今仗真係你急佢唔急，為保領先優勢必定踢得保守，呢班波近8仗半場全部打和，哥梅里卡奧攻力一般難咬得入佢哋，半場和追多鋪。

最後中冠盃G組分組賽，薩爾瓦多嘅聖達迪卡拉主場對危地馬拉球隊市政體育會，雙方實力可謂半斤八両，況且聖達迪卡拉跨季近10仗主場僅輸1場，仲有平手盤咁筍，不容錯過。