兩隊前鋒鬥騷哥利
今晚歐聯附加賽首回合好戲連場，蘇超班霸些路迪主場迎戰瑞典超馬模，「綠白兵團」上屆喺附加賽出局，今屆梗係唔想重蹈覆轍，前鋒施夫斯於聯賽坐波監抖到夠，必趁喺歐聯大舞台，力爭加盟後首個入波騷哥利，不過馬模老牌射手羅辛貝治腳風超順，挾住三連勝勢頭唔會縮，捧入球大好路。（有線62及202台周四凌晨2時45分直播）

近年些路迪喺蘇超可謂「無敵是最寂寞」，球迷同高層都想球隊能喺歐聯賽場有作為，點知上季初來甫到嘅新帥朗尼迪拿未摸熟隊波，搞到喺附加賽畀斯洛文尼亞球隊馬里博爾踢出局，真係瘀爆，朗尼迪拿更幾乎烏紗不保，好彩之後帶隊贏得聯賽同蘇聯盃「雙料冠軍」，總算度過危機。

施夫斯抖足盡情數胡
吸取咗呢個教訓，朗尼迪拿今屆不敢怠慢，之前兩圈歐聯外圍賽順利過關，依家距離「金庫」分組賽只係一步之遙，點會唔搏甩髀呢？至於今夏從登地聯來投嘅前鋒施夫斯，因為要坐越季坐監喺聯賽未曾披甲，變相令佢抖到夠，之前兩圈四仗施夫斯都有正選上陣但食白果，相信今仗會力爭加盟後首個士哥，回報朗尼迪拿對佢嘅信任，拍住上仗省兩粒嘅史超活岩士唐，攻力唔使懷疑。

馬模亦非善男信女，陣中有曾効力阿積士、雲達不來梅及西布朗嘅老牌射手羅辛貝治壓陣，呢位瑞典前鋒連續三場有波入，帶領馬模連贏三仗，腳風順到冇朋友，另一前鋒麥美迪亦可復出，喺後衞高菲艾度停賽下，馬模隨時以攻代守，希望爭取作客入球。睇番些路迪嘅主W得1.49倍熱而不穩，斯維寧玩有1.87倍嘅入球大。